Fadjar A.Hidayat:
Saemper jlagra. Daktatah jiwaku
nganggo tatah syahadat
Dakukir gegambarane sulur-sulur
kaimanan
Palu dzikir tansah dakthuthukake
anut wirama. Mripili gragal-gragal kanistan
kang tumempel angreridhu
embuh nganti kapan dadi prasasti suci
aku ora perduli
najan getih perih netes ngajak leren
bali dadi atosing watu
tan obah kena soroting cahyaNe
bali dadi pasren
tan kuwawa gumeter
krungu gurit-gurit-E
Jember, Juli ' 03
(Jaya Baya,No.01, Minggu 1/September 2003)