Fadjar A.Hidayat:
angen-angen mekar ngrembaka
ngebaki tlatah mardika kang nela
garing saka sihe rasa
tresna-tinresnan kaya dene
kombang lan kekembangan
nyipta jaring-jaring panguripan
endah kang ngasilake madu manis
lan yen impen-impen padha dadi pepundhen
fantasi dadi nabi
fatamorgana dikira nyata
mratandhani yen urip wis kari
angen-angen
awit pakarti wus kandheg pangucap
dadi kecap mbumboni sakeh kadurakan
angen-angen mekar ngrembaka
dadi kembang-kembang tatune nala
embuh kapan bisa kaentha lukisan
ing kanvas-kanvas jaman
ewadene ngranti tekane ing
stasiun iki
durung ana swarane kreta keprungu
Jember, Desember ' 03
(Jaya Baya, No.19-Minggu II Januari 2004)