Fadjar A. Hidayat :
EPISODE KLAWU WIT GEDHE
wit gedhe kebak pang gedhe cilik
iku biyen ngrembuyung godhonge
ijone nggugah rasa syukur ajak tafakur
ngukur hidayah-E kang tanpa wates
abange sung panjurung makantar-kantar
najan kudu gugur mbelani urip makmur
kuninge kuning gadhing
nguncarakake kukuhing oyot-oyote
ning ketiga dawa banjur neba
lesus musus gawe prahara
manuk cilik-cilik mampir ninggal wisa
thukuling kemladheyan
sanalika godhonge padha gogrog
nyuburake kemladheyan kang sesongaran
ngece sunaring srengenge
barat wingi kae
kasil nyempalake salah siji pange
nibani pang-pang liya
( dURUNG KAPACAK ANA KALAWARTA )